មន្ត្រីជំនាញកាំកុត្រូលតាកែវ៖ អាជីវករមួយចំនួនធំបានយល់ដឹងច្រើនអំពីសុវត្ថិភាពចំណីអាហារ
18-November-2019 | ដោយ ពលមនសិការ
តាកែវ៖ មន្ត្រីជំនាញកាំកុងត្រូលខេត្តតាកែវ បានអះអាងថា ក្រុមអាជីវករភាគច្រើន គឺពួកគាត់បានយល់ដឹងកាន់តែច្រើនអំពីសុវត្ថិភាពចំណីអាហារ ដោយដាក់លក់ទំនិញ និងចំណីអាហារដែលមានអនាម័យត្រឹមត្រូវ និងរកពុំឃើញសារធាតុគីមីនៅលើចំណីអាហារដូចមុននោះទេ។
ថ្លែងប្រាប់អ្នកសារព័ត៌មាន បន្ទាប់ពីបានបញ្ចប់ការត្រួតពិនិត្យទំនិញ និងចំណី អាហារ ជាច្រើនមុខ នៅក្នុងផ្សារតាកែវ ដែលស្ថិតនៅទីរួមខេត្តតាកែវ នាព្រឹកថ្ងៃចន្ទទី១៨ ខែវិច្ឆិកា ឆ្នាំ២០១៩នេះ លោក ប៉ោ លាងគង់ ប្រធានសាខាកាំកុងត្រូលខេត្ត បានមានប្រសាសន៍ថា នៅក្នុងការចុះត្រួតពិនិត្យទំនិញនេះ មន្ត្រីជំនាញរបស់យើងបានធ្វើតេស្តបឋមទៅលើចំណីអាហារមួយចំនួនធំ ធ្វើតេស្តរកជាតិអ៊ីយ៉ូតលើអំបិល និងពិនិត្យទៅលើគ្រឿងកំប៉ុងឃើញថា មានភាពត្រឹមត្រូវច្រើន ពោលគឺរកពុំមានសារធាតុគីមី និងទំនិញហួសកាលបរិច្ឆេទអ្វីឡើយ ព្រោះតែពេលនេះពួកគាត់មានការយល់ដឹងច្រើនអំពីសុវត្ថិភាព និងគិតគូរអំពីសុខភាពរបស់អ្នកទិញ ពិសេសតាមរយៈការចុះមកត្រួតពិនិត្យជាប់ជាប្រចាំ ក៏ដូចជាការអប់រំណែនាំបន្ថែមពីមន្ត្រីជំនាញកាំកុងត្រូល។
លោក ប៉ោ លាងគង់ បន្ថែមទៀតថា សុវត្ថិភាពចំណីអាហារនេះ វាពិតជាសំខាន់ខ្លាំងណាស់ សម្រាប់មនុស្សទូទៅ ព្រោះបើកាលណាក្រុមអាជីវករ ពួកគាត់បានដាក់លក់ទំនិញ និងចំណីអាហារដែលមានអនាម័យល្អត្រឹមត្រូវ និងគ្មានសារធាតុគីមី វានឹងឲ្យអ្នកបរិភោគ មានសុខភាពល្អរឹងម៉ាំ ជៀសផុតពីជំងឺផ្សេងៗ ដូច្នោះបញ្ហាសុវត្ថិភាពចំណីអាហារនេះ ក្នុងនាមយើងជាមន្ត្រីជំនាញកាំកុងត្រូល គឺនៅតែចុះត្រួតពិនិត្យទំនិញនៅលើទីផ្សារជាប់ជាប្រចាំ ពោលគឺមិនឲ្យទីផ្សាររបស់យើងពោរពេញទៅដោយអាហារគីមី និងទំនិញមិនស្អាតល្អនោះទេ។
បើតាម លោក ប៉ោ លាងគង់ តួយ៉ាងការធ្វើតេស្តទៅលើអំបិលដើម្បីរកសារធាតុអ៊ីយ៉ូត ក៏ក្រុមហ៊ុនបានភ្ញាក់រលឹក ហើយដាក់សារធាតុអ៊ីយ៉ូតនេះ នៅក្នុងអំបិលរបស់ខ្លួនផងដែរ ខុសពីលើកមុន ដែលមន្ត្រីជំនាញយើងបានធ្វើត្តេស៍រកជាតិអ៊ីយ៉ូតនៅក្នុងអំបិល ប៉ុន្តែរកពុំឃើញមានជាតិអ៊ីយ៉ូតនៅក្នុងអំបិល ដែលនេះបង្ហាញឲ្យឃើញថា ទាំងម្ចាស់ក្រុមហ៊ុនធំៗ និងក្រុមអាជីវករ បានចូលរួមសហការនឹងមន្ត្រីជំនាញកាំកុងត្រូល ក្នុងការលក់ទំនិញ ឬចំណីអាហារ ដែលមានសុវត្ថិភាព ល្អត្រឹមត្រូវ នៅលើទីផ្សារ៕
ចំនួនអ្នកទស្សនា
- ថ្ងៃនេះ4381
- ម្សិលមិញ20231
- សប្តាហ៍នេះ83461
- ខែនេះ105341
- ឆ្នាំនេះ105341
- សរុប20547797